Michuano ya kombe la dunia chini ya miaka 20 yaendelea kushika kasi Korea Kusini

Michuano ya kombe la dunia ya vijana chini ya umri wa miaka 20 inaendelea kushika kasi huko nchini Korea ya kusini ikiwa katika ngazi ya makundi.

Katika michezo ya kundi C wawakilishi wa Afrika timu ya Zambia walipata ushindi wa mabao 4-2 dhidi ya timu ya Iran. Nao Costa Rica wakatoshana nguvu na Ureno kwa Sare ya bao 1-1.

Kwenye kundi D Afrika ya kusini walichapwa na Italia kwa mabao 2-0, huku Uruguay wakiwafunga Japani kwa 2-0.

Michuano hiyo iliendelea tena jana katika kundi E ambapo Ufaransa ikajipatia nafasi ya kucheza hatua ya mtoano baada ya kuibanjua Vietnam kwa magoli 4-0 na kuwafanya wawe vinara wa kundi lao, nao New Zealand baada ya kupepetana na Honduras wakaondoka na ushindi wa 3-1.

Katika kundi F Saudi Arabia wakapata ushindi wao wa kwanza baada ya kuwagaragaza Ecuador kwa 2-1. Nayo Marekani ikaongoza kundi baada ya kupambana na Senegal na kupata ushindi mwembamba wa goli 1-0.