Kombe la Shirikisho barani Afrika: Gor Mahia yatoa kipigo cha aibu kwa Yanga

Yanga ya Tanzania imeshindwa kucheza muziki wa Gor Mahia fc ya Kenya katika mchezo wa mzunguko wa kwanza wa Kombe la Shirikisho Afrika kwa kuambulia kichapo cha mabao 4-0 mchezo huo uliopigwa jijini Nairobi usiku wa kuamkia leo.

Ushindi huo wa Gor Mahia unawafanya waendelee kukalia nafasi ya pili katika kundi D wakifikisha jumla ya alama 5 huku MC Alger walio kileleni wakiwa na pointi 7 wakati Rayon Sports ya Rwanda ikishika nafasi ya tatu ikiwa na pointi 2.

Yanga imekuwa timu ya kwanza ndani ya kundi hilo kuruhusu mabao 9 baada ya kipigo cha mabao 4-0 dhidi ya MC Algeria kwenye mchezo wa kwanza uliopigwa huko Algeria.

Mchezo mwingine: mshambuliaji wa kimataifa wa Tanzania Thomas Ulimwengu, ameifungia bao la ushindi El Hilal ikiibwaga Songo ya Msumbiji magoli 2-1 katika mchezo wa Kundi B uwanja wa Al Hilal mjini Omdurman.