Wapenzi wasikilizaji, sauti uzozisikia ni ya pilikapilika za sherehe iliyofanyika kati ya familia moja ya kabila la wauygur na watalii ambayo iliandaliwa na shirika la utalii la huko na kujulikana kwa "Furaha ya familia za wakulima". Shughuli hiyo hasa ni kupeleka watalii huko kula chakula na kulala nyumbani kwa wakulima na kujifurahisha kwa michezo pamoja nao.

Maiguli ni msichana mrembo wa kabila la wauygur. Alisema kuwa kila ifikapo msimu wa utalii, kuna watalii wengi wanaotembelea nyumbani kwao ambapo anawaonesha watalii ngoma za kwao. Mwandishi wa habari alimwuliza,

"Watalii waliotembelea nyumbani kwenu, mara kwa mara wanacheza ngoma pamoja na ninyi? "

Maiguli alimjibu, "Ndiyo, wageni wakitutembelea, huwa tunacheza ngoma pamoja nao, baba, mama, dada na kaka zangu tunacheza nao pamoja.Turpan ni sehemu inayojulikana hapa nchini kwa uzalishaji wa zabibu. Kila mwaka kuna wageni wanaotoka sehemu mbalimbali duniani kutembelea hapa kwetu, kuonja matunda ya zabibu, zabibu zilizokaushwa pamoja na mvinyo, na shughuli ile ijulikanayo kwa "Furaha ya familia za wakulima" inaongeza furaha kwa wageni."

Maiguli alisema kuwa hivi sasa kila mwaka kuna wageni wengi wanaotembelea nyumbani kwao, na familia yao inapata Yuan elfu 30 hadi elfu 40 kwa mwaka.

Habari zinasema kuwa watalii waliokwenda Turpan kushiriki kwenye utalii wa "Furaha ya familia za wakulima" mbali na wale waliotoka sehemu nyingine nchini, kulikuwa na wageni kutoka nchi za Japani, Marekani, Ujerumani, Ufaransa, Italia, Uholanzi na Hispania.

"Furaha ya familia za wakulima" ni njia mojawapo ya kukuza mambo ya utalii na kuongeza pato la wakazi wa sehemu ya Turpan. Turpan inazingatia sana ustawishaji na ufanisi wa matumizi ya rasilimali za utalii za huko wakati inapoendeleza mambo ya utalii.

Turpan ina sehemu nyingi zenye mandhari nzuri ya kimaumbile ambazo ni pamoja na ziwa la Aiding. Ziwa hilo ni sehemu iliyo chini kabisa kwenye ardhi nchini China ambalo liko chini ya usawa wa bahari kwa mita 154 na pia ni sehemu ya pili kwa kuwa chini sana ya usawa wa bahari humu duniani ikiifuatia Dead Sea. Sehemu ya ziwa la Aiding pia ni sehemu yenye joto sana nchini China, hali-joto yake inaweza kufikia nyuzi 47 kwa kipimo cha centigrade. Licha ya hayo huko kuna bonde la mizabibu lenye umbali wa kilomita 7 lenye mandhari nzuri na mizabibu mingi. Katika majira ya mavuno ya zabibu, watalii wengi hupenda kutembelea huko na kuonja zabibu.

Turpan iko kwenye njia ya hariri iliyojulikana sana zamani za kale na imekuwa na sehemu nyingi za kiutamaduni. Mkurugenzi wa shirika la utalii la sehemu ya Turpan Bw. Wali Niyaz alisema,

"Kwa wageni wanaofika hapa Turpan, tunapenda sana kuwafahamisha mabaki ya mji wa kale wa Jiaohe ambao ni mji wa kwanza wa kale kwa kuhifadhiwa vizuri ambao ulijengwa zaidi ya miaka elfu mbili iliyopita na hivi sasa hakuna wakazi. Hivi sasa tumetoa ombi la kuuorodhesha mji huo wa kale kuwa urithi wa dunia. Muda si mrefu uliopita, wataalamu kutoka shirika la elimu, sayansi na utamaduni la umoja wa mataifa UNESCO walifika hapa kufanya uchunguzi, ikaonekana kuwa ombi letu hilo linaelekea kufanikiwa."

Vitu vingine maarufu vya kiutamaduni vya huko ni pamoja na mnara wenye mtindo pekee wa kiislamu, mji maarufu wa kale wa Ganchang na mapango ya budha pamoja na mila la desturi za makabila madogo madogo.

Bw. Wali Niyaz alisema kuwa hata katika mwaka 1989, sehemu ya Turpan ilikuwa imebuni sera za kukuza mambo ya utalii na kutunga sera nyingi bora. Baada ya kujitahidi kwa miaka zaidi ya 10, sehemu nyingi za utalii zimeendelezwa ipasavyo, hatua ambayo imechangia katika maendeleo ya uchumi wa huko. Alisema,

" Baada ya kujitahidi kwa miaka hiyo iliyopita, mambo ya utalii ya Turpan yalikuzwa haraka. Mwaka uliopita, tulipokea watalii zaidi ya milioni 1 na laki 5 ambao zaidi ya laki 2 ni wale waliotoka nchi za nje, na pato letu kutokana na utalii lilikuwa zaidi ya Yuan za Renminbi milioni 380, sawa na dola za kimarekani 46 likichukua 5% ya jumla ya thamani ya pato la sehemu hiyo. Hivi sasa, idadi ya watalii inaongezeka kwa 20% kwa mwaka."

Bw. Wali Niyaz anaona kuwa kutokana na kasi ya maendeleo ya utalii ya hivi sasa, basi itakapofika mwaka 2010, pato kutokana na utaliii katika sehemu ya Turpan litaweza kuchukua 8% ya jumla ya thamani ya pato lake. Sehemu ya Turpan itakuwa na maendeleo makubwa katika mambo ya utalii, ilimradi iendeleze na kutumia vizuri rasilimali za utalii ya huko.

Habari zinasema kuwa katika siku za baadaye, sehemu ya Turpan itakuza uzalishaji wa bidhaa zenye umaalumu wa kikabila wa huko pamoja na vitu vya kumbukumbu vya utalii. Licha ya kuendelea kuzalisha mazao bora ya zabibu zilizokaushwa, mvinyo na matunda, itazalisha vitu vya kumbukumbu vya utalii vya kiwango cha juu ili kuongeza pato la wakazi wa huko na kuboresha maisha yao.

Wasikilizaji wapendwa mliyokuwa mkisikiliza ni makala kuhusu maendeleo ya mambo ya utalii ya sehemu ya Turpan. Kipindi hiki cha nchi yetu mbioni kinaishia hapa kwa leo, tutakutana tena hewani Jumanne ijayo wakati kama huu, ni mtangazaji wenu Luda, nikisema kwa herini.