Kongamano la mwaka 2024 la Maendeleo ya Mtandao na Ushirikiano kati ya China na Afrika lilifanyika hivi karibuni mjini Xiamen, China. Kutokana na maendeleo ya haraka ya mtandao na teknolojia ya kidijitali, ushirikiano kati ya China na Afrika katika nyanja hizi umepata mafanikio makubwa na una mustakabali mzuri.

Kongamano hilo lenye kauli mbiu ya “Kujenga kwa Pamoja Uhusiano wa Kiwenzi wa Uvumbuzi wa Teknolojia ya Kidijitali, na Kuanzisha kwa Pamoja Mustakhbali Mzuri”, limelenga kutoa jukwaa kwa China na Afrika kupanua na kuimarisha mawasiliano na ushirikiano katika nyanja za uchumi wa kidijitali, usalama wa mtandao, vyombo vya habari vya mtandaoni, na usimamizi wa akili bandia, ili kuimarisha mazungumzo na mawasiliano kati ya pande hizo mbili katika sekta ya mtandao, na kujenga kwa pamoja jumuiya yenye mustakabali wa pamoja katika sekta ya mtandao.

Kwenye kongamano hilo, wajumbe wa Afrika wamesema China ni mshirika mkubwa wa Afrika katika nyanja za kidijitali, na wanatarajia kutumia jukwaa hilo kama fursa ya kuzidisha ushirikiano wa kunufaishana, kuhimiza ujenzi wa miundombinu ya kidijitali, kukuza ujasiriamali wa kidijitali barani Afrika, na kuharakisha maendeleo ya biashara ya mtandaoni.

Katika miaka ya hivi karibuni, mawasiliano na ushirikiano kati ya China na nchi za Afrika katika nyanja za usalama wa mtandao, vyombo vya habari vya mtandaoni, uchumi wa kidijitali na teknolojia ya kidijitali yameongezeka na kuleta fursa na mafanikio makubwa kwa pande zote mbili.

Kwanza, ushirikiano wa mtandao utanufaisha maendeleo ya teknolojia na uvumbuzi wa mtandao kwa China na Afrika. Kupitia ushirikiano wa mtandao, China na Afrika zinaweza kufanya utafiti na uvumbuzi wa sayansi na teknolojia kwa pamoja, na kutatua changamoto, ili kuhimiza ukuaji wa uchumi na maendeleo ya jamii. Afrika ni moja ya kanda zenye kiwango cha chini cha teknolojia ya mtandao. Kwa uwekezaji na ushirikiano wa China, miundombinu ya mtandao barani Afrika inaboreshwa. Kupitia ushirikiano wa mtandao na China na Afrika, nchi za Afrika zitaweza kutumia vyema teknolojia ya mtandao ili kukuza maendeleo ya uchumi na jamii, na kupunguza pengo la kidijitali na nchi zilizoendelea.

Pili, ushirikiano kati ya China na Afrika kwenye sekta ya mtandao utaharakisha maendeleo ya biashara ya mtandaoni kwa pande zote mbili. China imekuwa soko kubwa zaidi la biashara ya mtandaoni duniani kwa miaka 11 mfululizo, huku ushirikiano wa kimataifa wa China katika biashara ya mtandaoni ukiongezeka hatua kwa hatua. Ushirikiano wa kimataifa unaweza kuchochea zaidi maendeleo ya biashara ya mtandaoni ya China. Kwa nchi za Afrika, ushirikiano na China unasaidia maendeleo ya biashara yao ya mtandaoni. Kupitia ushirikiano huo, nchi za Afrika zitaweza kuendeleza biashara ya mtandaoni kwa haraka zaidi, kukuza maendeleo ya viwanda vya ndani, kuongeza ajira, na kuboresha maisha ya watu.

Tatu, ushirikiano wa mtandao utakuza maelewano kati ya China na Afrika. Teknolojia ya mtandao hutoa uwezekano usio na kikomo kwa mawasiliano ya watu. Watu wa China na Afrika wanaweza kubadilishana habari, utamaduni, na kazi zao za kisanii kupitia mtandao ili kuongeza maelewano na urafiki.