Tamthilia na filamu nyingi za Kichina ambazo zinatafsiriwa kwa lugha mbalimbali, zinazidi kujizolea umaarufu na kupata mashabiki wengi katika majukwaa mbalimbali duniani. Hii inaashiria kuwa tasnia ya burudani ya kimataifa kwa sasa haitawaliwi tena na utamaduni wa kimagharibi pekee.

Tangu mwaka 2014, tamthilia nyingi zaidi za Kichina zimekuwa zikionyeshwa kwenye majukwaa ya kimataifa kama vile YouTube, Netflix, Amazon Prime, na Hulu, na sasa zimefika hadi kwenye televisheni za nchi za Afrika zikiwemo Tanzania na Kenya.

Kutokana na kuongezeka kwa uwekezaji na bajeti katika tasnia ya burudani ya China, hadhira ya kimataifa inayofuatilia maudhui ya Kichina inaendelea kukua, kutokana na uzalishaji bora na wa hali ya juu wa filamu hizi, pamoja na mvuto tofauti wa kitamaduni unaoonekana katika tamthilia hizi. Tamthilia nyingi za China zilizofanya vizuri na kufanikiwa zimetafsiriwa kwa lugha tofauti ikiwemo Kiswahili

Kurushwa kwa tamthilia za Kichina zinazotafsiriwa kwa lugha ya Kiswahili kwenye televisheni za nchi hizi za Afrika Mashariki, kumepanua wigo wa soko la filamu la China katika Afrika na sasa China imeamua hata kurikodi baadhi ya filamu hizi nchini Tanzania.

Hivi karibuni tamthilia mpya ya Kichina inayoitwa “Karibu Kijiji cha Milele” ilizinduliwa nchini Tanzania na Waziri wa Utamaduni, Sanaa na Michezo Mhe. Dkt. Damas Ndumbaro huko Jijini Dar Es Salaam. Awali tamthilia hii iliyorikodiwa nchini Tanzania, ilioneshwa China na kupata mwitikio mzuri sana, ambapo wengi wa watazamaji walieleza hamu yao ya kutaka kutembelea Tanzania kujionea kwa macho yao Mlima Kilimanjaro na mandhari nyingine za kuvutia zilizoonyeshwa kwenye tamthilia hiyo kama vile mbuga za wanyama na fukwe safi za visiwa vya Zanzibar.

Tamthilia hii inaeleza namna timu ya madaktari wa afya kutoka China walivyokuja Tanzania kutoa huduma hiyo na kusimulia hadithi ya wafanyakazi hao wanaokoa maisha na kujenga urafiki wa kina na wenyeji wao barani Afrika. Kabla ya kufunga safari kwenda kusaidia kutibu watu wa Afrika, madaktari na wafanyakazi wa afya wanafunzwa lugha hii adhimu ya Kiswahili ili wakifika Tanzania ambapo katika tamthilia hii ilipewa jina la Sanah, wasipate tabu sana kwenye masuala ya kuwasiliana.

Katika uzinduzi huo uliofanyika Agosti 23, 2024 Mhe. Waziri Ndumbaro aliambatana na Balozi wa China nchini Tanzania, Mhe. Chen Mingjian ambapo alimuomba kushirikiana na Tanzania kuandaa filamu maalum itakayoonesha namna nchi hizo zilivyoshirikiana katika harakati za ukombozi.

Kinachovutia zaidi kwenye tamthilia hii ya “Karibu Kijiji cha Milele” inayorushwa kupitia Televisheni ya Azam na kuwa na jumla ya sehemu 35, ni kwamba mwalimu anayewafunza Wachina Kiswahili pia ni Mchina. Hii inatoa taswira kwamba China ina walimu wake wa Kiswahili waliojifunza lugha hii na pia inathibitisha kwamba walimu wa Kiswahili ambao ni Wachina wamebobea kwenye lugha hii.

Imekuwa ni kawaida ya China kutuma vikundi ama timu za madaktari barani Afrika ili kusaidia kutoa huduma za matibabu, na kufanikiwa kutibu magonjwa mbalimbali, ambapo hadi leo wenyeji wa nchi hizo wanaishukuru na hawataisahau China kwa msaada wake kwa watu hao.

Ni nadra sana kuona tamthilia za Kichina zikitumia lugha za Afrika yaani kabla ya kutafsiriwa kwa lugha za kigeni. Mara nyingi imezoeleka kuonekana tamthilia hizi zikitumia lugha ya Kiingereza ama nyingine za Ulaya. Hii ni mara ya kwanza kutumika maneno mengi ya Kiswahili kwenye tamthilia ya Kichina, jambo ambalo linaonesha kwamba sasa China imedhamiria kwelikweli kuwa pamoja na kushirikiana na wenzake wa Afrika.

"China imepanda na kuwa mtayarishaji muhimu wa tamthilia na filamu katika soko la kimataifa," anasema Zhu Xinmei, mkurugenzi wa Taasisi ya Kimataifa ya Utafiti wa Mawasiliano ya Kituo cha Utafiti wa Maendeleo katika Idara ya Taifa wa Redio na Televisheni.

Licha ya changamoto kama vile tofauti za kitamaduni kati ya China na nchi za Afrika, na haja ya kuongeza zaidi mitandao ya usambazaji katika nchi za nje, inaonekana kwamba kuna matumaini makubwa katika ulingo wa tamthilia za televisheni za China, ambapo tamthilia na filamu hizi zitaonekana zaidi katika soko la filamu la kimataifa katika siku zijazo.

Katika miaka ya hivi karibuni, umeibuka mwelekeo mpya wa tamthilia na filamu za Kichina. Baadhi ya Filamu ziliandaliwa kwa ustadi mkubwa unaolenga kuonesha mafanikio ya China kama nchi yenye nguvu kubwa duniani, au kukumbuka nyakati mahususi za kihistoria, ama kuangazia urafiki wa miongo mingi kati ya China na nchi za nje na kuonesha mchango wake kimataifa katika nchi za nje mathalan tamthilia hii ya “Karibu Kijiji cha Milele” ambayo imejipatia umaarufu katika masoko ya nje, licha ya kwamba aina ya filamu kama hizi huwa zinapata changamoto katika kuleta matokeo mazuri katika nchi za nje.

Kutokana na kuchochewa na hadithi za maisha halisi za zaidi ya timu 30 za matibabu za China zilizotumwa katika nchi za Afrika, tamthilia hii imepata maoni zaidi ya milioni 2 nje ya nchi. Pia “Karibu Kijiji cha Milele” ilipokea tuzo iliyoangazia urafiki kati ya China na Tanzania kutoka kwa rais wa Tanzania, Samia Suluhu Hassan, mwishoni mwa Agosti mwaka 2023.

Kama mojawapo ya mifano mashuhuri zaidi, Filamu ya Kichina iliyotafsiriwa kwa Kiswahili ijulikanayo kwa jina la “Bibi Harusi Wangu wa Kiafrika” imekuwa ikifuatiliwa zaidi kwenye mitandao hasa wa Youtube na pia kuoneshwa kwenye nchi za Afrika Mashariki ikiwemo Tanzania.

Filamu hii ya mapenzi, inaonesha maisha halisi ya ndoa ya Mwafrika na Mchina. Awali ilikuwa vigumu mwanamke huyu kutoka Afrika kukubalika katika maisha ya Wachina, lakini baada ya kuishi naye na kujua kwa undani tabia za Waafrika, hatimaye taratibu walianza kumpenda mkwe na shemeji yao huyu kutoka Afrika.

Watazamaji wengi kwenye youtube walitoa maoni mengi na kupongeza uandaaji wa filamu hii wakisema hadithi yake ni nzuri, ya kusisimua na ya kugusa moyoni, huku wengine wakieleza kwamba walishindwa kujiuzia kutokwa na machozi.

Filamu nyingine iitwayo “Safari ya kuelekea Kusini” nayo pia itakonga nyonyo za watazamaji wa Afrika hasa Tanzania. Filamu hii inaelezea hadithi ya Mwanaume wa makamo Zeng Fu anayekumbwa na matatizo ya kikazi na kifamilia. Jamaa na marafiki walimkopa pesa lakini hawakumrudishia, na pia walimfanyia hila nyinyi. Hivyo alilazimika kuifunga kampuni yake na kuuza gari lake ili kulipa madeni. Pia alikuwa na mzozo mkubwa na mwalimu na mke wake kuhusu elimu ya mtoto wake. Baada ya kuona dunia imempa kisogo huku akiwa hana mtu wa kumlalamikia shida zake, aliamua kufunga safari ya kwenda Xizang alikokutana na watu mbalimbali.

Tamthilia hizi bora za Televisheni zinajumuisha maadili mbalimbali ya Kichina, zinaonyesha moyo wa kujituma wa watu wa China, zinatoa safu mpya ya chaguo kwa watazamaji wa kimataifa, na kufungua milango mipya kwa tamthilia za Kichina kuwafikia watazamaji wa kimataifa.

Wakati mwaka huu China na Tanzania zinaadhimisha miaka 60 ya uhusiano wa kibalozi, kauli mbiu ikiwa ni “Mwaka wa utamaduni na utalii”, ni matarajio ya kila mdau na mtazamaji wa tamthilia za Kichina zilizotafsiriwa kwa Kiswahili, kwamba mbali na kazi hii ya China ya kuleta burudani na kutoa elimu kuhusu utamaduni na maadili ya Wachina, pia kutakuwa na shughuli nyingi zaidi za kutangaza tasnia ya filamu ya Tanzania nchini China, ikiwemo kutafsiri tamthilia na filamu za Kiswahili kwa lugha ya Kichina.