Rais Samia Suluhu Hassan wa Tanzania ametoa pongezi za dhati kwa Rais Xi Jinping wa China kwa kuadhimisha miaka 75 tangu kuanzishwa kwa Jamhuri ya Watu wa China.

Katika salamu zake alizozitoa kupitia mtandao wa kijamii wa X, Rais Samia alisisitiza dhamira ya Tanzania ya kuimarisha urafiki wa kudumu kati ya mataifa hayo mawili.

“Pongezi zangu za dhati kwa Mheshimiwa Rais Xi Jinping kwa kuadhimisha Miaka 75 ya kuanzishwa kwa Jamhuri ya Watu wa China. Tanzania inaendelea na dhamira yake ya kuimarisha urafiki wetu wa pande zote,” aliandika.

China inaadhimisha safari yake ya miaka 75, ambayo ilianza Oktoba 1, 1949, wakati Mwenyekiti Mao Zedong alipotangaza kuanzishwa kwa Jamhuri ya Watu wa China katika Uwanja wa Tian’anmen, Beijing.

Kuanzishwa kwa Jamhuri ya Watu wa China kuliashiria mwisho wa vita vya wenyewe kwa wenyewe vilivyodumu kwa muda mrefu na karne za utawala wa kifalme nchini China, na kuweka msingi wa mabadiliko yake ya kushangaza hadi kuwa nchi ya pili duniani kwa uchumi mkubwa.