Mwigizaji wa Uingereza Idris Elba ameiambia BBC kwamba atahamia Afrika ndani ya miaka kumi ijayo kama sehemu ya mipango yake ya kusaidia tasnia ya filamu barani humo.

Nyota huyo mwenye umri wa miaka 52 wa kipindi maarufu cha The Wire ndio msimamizi wa miradi michanga ya kujenga studio ya filamu katika visiwa vya Zanzibar pamoja na Accra nchini Ghana.

Elba amabaye ni mzaliwa wa London, ambaye mama yake anatoka Ghana na baba kutoka Sierra Leone, ana uhusiano mkubwa na Afrika. Anataka kutumia uwezo wake wa kuwa nyota mashuhuri duniani kusaidia biashara yake ya filamu inayoendelea kukua kwani anasema ni muhimu Waafrika wapate fursa za kusimulia hadithi zao wenyewe.

Mapema mwaka huu Waziri wa Nchi, Ofisi ya Rais, Kazi Uchumi na Uwekezaji, Shariff Ali Shariff alinukuliwa na vyombo vya habari vya ndani akisema, studio hiyo itakuwa sawa na kama zile za "Hollywood, Nollywood au Bollywood" - na inaweza kuzaliwa "Zollywood".