Israel imezidisha mashambulizi yake dhidi ya Syria, na kushambulia vitongoji viwili vya makazi huko Damascus na maeneo ya mpaka wa Syria na Lebanon katika mkoa wa Homs.

Wizara ya Ulinzi na Televisheni ya taifa ya Syria wamesema watu 15 wameuawa, na wengine 16 wamejeruhiwa baada ya jeshi la Israel kushambulia majengo matatu ya makazi katika kitongoji cha al-Mazzeh magharibi mwa Damascus.

Katika shambulizi lingine la anga, Israeli imeshambulia moja ya majengo ya mambo ya elimu katika eneo la makazi katika kitongoji cha Qudsaya kaskazini magharibi mwa Damascus, na kusababisha uharibifu.

Mshambulizi hayo ya Israel yamefanyika wakati wa ziara ya mshauri mwandamizi wa kiongozi mkuu wa Iran Bw. Ali Larijani, ambaye alikutana na Rais Bashar al Assad wa Syria.